蔡Sir說：“喺山嶺搜救，最困難係準確定位傷者所在，特別係身處晚間、密林、斜坡等環境。好似上年4月24日凌晨曾接報，一個伯伯喺馬鞍山郊野公園附近墮山，需要動用各種攀山工具進行搜救。當時我哋聯同警察、民安隊、飛行服務隊合作營救，攀山拯救專隊一行八人攜帶共200公斤重嘅拯救器材同工具上山，平時登上山頂須要45分鐘，但當時環境又黑又濕，山坡凹凸不平布滿碎石，花咗兩個鐘頭先到達山頂，未開始搜救已消耗咗大半體力，而伯伯仲可以支持幾耐則屬未知之數，情況危急。”
蔡Sir憶述，幸好當時伯伯的手機仍可聯絡拯救人員，根據其描述的方位，終於順利從山腰位置，由專隊人員從行山徑打橫“爆林”深入山坡，到達其所在位置。“見到伯伯時他已近乎虛脫，身體倒掛喺樹木之間，被荊棘纏結，滿身傷痕，動彈不得，再向下墮就係懸崖。”由攀山拯救支援隊到場拯救起計，橫跨七小時才終於順利將伯伯帶回山腳，迎接翌日晨光。
每次成功拯救一條生命，蔡Sir都感受到一份無比的滿足感，既實踐了兒時“我的志願是做消防員”，又能夠集合行山、攀山和教學工作的喜好於一身。蔡Sir笑言：“此生無憾！”
記者一再問他真的無憾？蔡Sir思索了一會說：“兩年前有一晚，我送女兒到機場，她要出發去外國升讀大學，佢由細到大都未試過離開我咁耐，我哋經常一齊行山，好唔捨得。但我突然接到消防局電話，話有行動要即時出發，我唯有離女兒而去。”
“對我嚟講，呢個係一個小遺憾，感恩她好明白爸爸嘅職責所在，仲反過來支持我、安慰我唔好將呢件事放喺心中。”蔡Sir續說：“我覺得很榮幸，其實人生總有取捨，莫說我十分喜歡我嘅工作，而且能夠幫到人、救人，真是絕對值得。”鐵漢也有柔情一面。 |
