六、如何從教改錯誤中有所改善?
梁:而家最大問題係主事官員覺得自己諗嗰套啱晒,對於嗰啲前線教育工作者完全嗤之以鼻,覺得我諗嗰啲無得錯,你哋行埋一邊,你最好都係唔好講嘞。
曾:我只係想對所有投身教育工作者,不論做政策嘅,做老師嘅,每個人都要公道一啲。
七、如何確保基建工程上馬?
梁:呢句說話證明曾先生都幾脫節,而且無反省能力,立法會唔係專登同你過唔去,係你向單一大財團進行單一傾斜吖嘛。政府應該反省一吓,唔好吓吓話人阻住你。如果俾市民參與規劃,肯定好多工程都可以上馬。
曾:我要維持每一年投放290億喺工程方面,會跟住呢個方向盡快喺五年內落實;呢啲工程(沙中線等)會跟住上馬,我只希望梁先生嘅公民黨,唔好阻住呢啲工程就可以嘞。
八、闡述治港理念
梁:有競爭先有進步;香港係需要變,好似一間大公司咁,如果要變,首先要換邊個?就係行政總裁。
曾:呢個辯論畀我嘅感覺係Alan樣樣都話要改法例請律師,做各方面法律修改工作,搞到香港就好似律師治港咁。
九、擔任特首資格
梁:曾先生喺呢18個月內做咗啲乜嘢政績出嚟呢?(政改)五號報告書過唔到,西九(計劃)整裝再上馬,做到嘅可能係天星鐘樓,果斷一日之內將佢拆咗送咗去堆填區,仲要碎埋。
曾:我哋提交咗過300條附屬條例,另外又有700宗新財政計劃落實咗,幫咗香港人;我哋其實係做咗好多工夫,最重要唔好成日掛住人哋做唔到啲乜嘢。 |